بیرسٹر گوہر کا بانی پی ٹی آئی کے علاج اور ذاتی ڈاکٹروں تک رسائی کا مطالبہ

پاکستان تحریک انصاف (پی ٹی آئی) کے چیئرمین بیرسٹر گوہر علی خان نے کہا ہے کہ جمعیت علمائے اسلام (ف) کے سربراہ مولانا فضل الرحمان کی اپنی ایک الگ جماعت اور سیاست ہے؛ میں نے قومی اسمبلی میں ان کی تقریر کے بعد ان سے کہا تھا کہ بعض سخت الفاظ نہیں بولنے چاہئیں تھے، کیونکہ سیاسی کشیدگی کو کسی طور نہیں بڑھنا چاہیے اور اگر ملک، قوم اور جمہوریت کی بہتری کے لیے کچھ کرنا ہے تو سیاسی تناؤ کو کم کرنا ہوگا۔

اسلام آباد میں میڈیا سے گفتگو کرتے ہوئے بیرسٹر گوہر نے کہا کہ اسمبلی میں حکومتی نمائندوں نے جس طریقے سے مولانا فضل الرحمان کی تقریر پر جواب دیا وہ بھی نامناسب تھا۔ انہوں نے بتایا کہ 8 اپریل کے بعد سلمان صفدر کی بانی پی ٹی آئی عمران خان سے پہلی ملاقات ہوئی ہے جو ایک خوش آئند پیش رفت ہے، کیونکہ تقریباً 380 دن کے طویل عرصے بعد یہ ملاقات ممکن ہو سکی ہے۔ انہوں نے مؤقف اختیار کیا کہ اگر کسی قیدی کو 15 دن تک اس کی فیملی اور وکلائے صفائی سے نہ ملنے دیا جائے تو یہ بنیادی انسانی حقوق کی سنگین خلاف ورزی ہے۔ ان کا کہنا تھا کہ اگر بانی پی ٹی آئی سے سیاسی ملاقاتیں کا سلسلہ بلا تعطل جاری رہتا تو ملک میں ایسا سیاسی بحران پیدا نہ ہوتا اور خیبر پختونخوا میں ایمرجنسی اور گورنر راج کے نفاذ کی نوبت نہ آتی۔

بیرسٹر گوہر نے وضاحت کی کہ وہ اپنے بانی پی ٹی آئی سے ملاقات کے لیے حتمی نام منتخب ہونے کی پہلے بھی تردید کر چکے ہیں، تاہم انہوں نے ہمیشہ سیاسی رہنماؤں کی ملاقات کروانے کی سنجیدہ کوشش کی جن میں ان کا اپنا نام اور علامہ ناصر عباس کا نام شامل تھا۔ پشاور ہائیکورٹ کے حوالے سے گفتگو کرتے ہوئے انہوں نے کہا کہ وزیراعلیٰ خیبرپختونخوا اور اسپیکر اسمبلی کی مبینہ عدم دستیابی اور بازیابی کا معاملہ لارجر بینچ کو بھیج دیا گیا ہے، جہاں سے جلد انصاف کی امید ہے۔ چیئرمین پی ٹی آئی نے بانی پی ٹی آئی سے منسوب ان خبروں کی بھی یکسر تردید کی کہ انہوں نے خیبرپختونخوا حکومت کے خاتمے یا گورنر راج پر خوشی ظاہر کی ہو، اور انہوں نے مطالبہ کیا کہ سیاسی انتقام کا سلسلہ فوری روکا جائے کیونکہ غیر سیاسی خواتین کا جیلوں میں ہونا جمہوریت کے لیے ایک گناہ کے مترادف ہے۔