وزیراعظم شہباز شریف دو روزہ دورے پر بحرین روانہ

وزیراعظم محمد شہباز شریف آج دو روزہ سرکاری دورے پر مملکتِ بحرین روانہ ہوگئے۔ وزیراعظم 26 سے 27 نومبر تک بحرین کی اعلیٰ قیادت سے ملاقاتیں کریں گے۔ وفد میں نائب وزیراعظم و وزیرِ خارجہ سینیٹر محمد اسحاق ڈار، وفاقی وزراء اور سینئر حکومتی افسران بھی شامل ہیں۔
وزیراعظم اپنے دورے کے دوران بحرین کے بادشاہ عزت مآب حمد بن عیسیٰ الخلیفہ، ولی عہد و وزیراعظم عزت مآب شہزادہ سلمان بن حمد الخلیفہ اور نائب وزیراعظم عزت مآب شیخ خالد بن عبداللہ الخلیفہ سے اہم ملاقاتیں کریں گے۔
یہ دورہ پاکستان اور بحرین کے دیرینہ اور خوشگوار تعلقات کا مظہر ہے، جس کا مقصد دونوں ممالک کے درمیان تزویراتی اور نتائج پر مبنی شراکت داری کو مزید مضبوط بنانا ہے۔ اس دورے سے باہمی اعتماد، گرمجوش تعلقات اور عوامی روابط کو نئی جہت ملے گی، جو دونوں ممالک کے لیے فائدہ مند تعاون کو فروغ دے گا