وزیرِ اعظم کا پاکستان میں معاشی اصلاحات کے مؤثر نفاذ پر اظہار اطمینان

وزیرِ اعظم نے عالمی مالیاتی فنڈ کی جانب سے جاری مالی پروگرام اور پاکستان میں معاشی اصلاحات کے مؤثر نفاذ پر اظہار اطمینان کیا ہے۔ وزیرِ اعظم نے کہا کہ حکومتی معاشی ٹیم، بالخصوص وزیر خزانہ محمد اورنگزیب اور ان کی ٹیم کی محنت اور کوششوں کے نتیجے میں یہ کامیابی ممکن ہوئی ہے۔
وزیرِ اعظم نے کہا کہ اصلاحاتی ایجنڈے کے نفاذ اور پاکستان کی معاشی ترقی کی راہ ہموار کرنے میں فیلڈ مارشل سید عاصم منیر، چیف آف آرمی اسٹاف و چیف آف ڈیفنس فورسز، کا معاونت کا کلیدی کردار رہا ہے۔ انہوں نے مزید کہا کہ حالیہ مالی اجراء اس بات کا ثبوت ہے کہ پاکستان معاشی استحکام اور ترقی کے لیے ضروری اقدامات پر عمل کر رہا ہے۔
وزیرِ اعظم نے بتایا کہ ڈیفالٹ کے دہانے سے ملک کو استحکام اور ترقی کی سمت میں لانا ایک مشکل مرحلہ تھا جس کے لیے تمام اسٹیک ہولڈرز نے قربانی دی۔ سیاسی جماعتوں نے سیاست کی قربانی دی اور عوام نے معاشی مشکلات برداشت کیں، جس سے ناممکن کو ممکن بنایا گیا۔
انہوں نے کہا کہ اللہ کے فضل و کرم سے پاکستان کی معاشی اصلاحات اور ڈیجیٹائیزیشن کامیاب کیس اسٹڈی کے طور پر دنیا بھر میں مثال بن گئی ہے اور پاکستان کی معاشی ترقی کا خواب جلد شرمندہ تعبیر ہوگا۔ وزیرِ اعظم نے مزید کہا کہ استحکام کے بعد ترقی کی سمت میں معیشت کے حوالے سے ابھی مزید محنت درکار ہے اور وہ بطور خادمِ پاکستان، عوام کی خوشحالی اور ملک کی بیرونی قرضوں سے نجات تک کام جاری رکھیں گے۔
وزیرِ اعظم نے یقین دلایا کہ انشاء اللہ وہ وقت دور نہیں جب پاکستان قرضوں سے مکمل نجات حاصل کر کے معاشی طور پر خود کفیل ہوگا۔