صدر مملکت نے اہم ترمیمی بلز، تقرری، سول اعزازات، سزاؤں میں خصوصی کمی کی منظوری دیدی

اسلام آباد: صدرِ مملکت آصف علی زرداری نے قانون سازی کے کئی اہم اقدامات بشمول پاکستان شہریت (ترمیمی) بل 2026 اور پیمرا (ترمیمی) بل 2026 کی باقاعدہ منظوری دے دی ہے۔ ایوانِ صدر سے جاری کردہ اعلامیے کے مطابق، منظور کیے گئے دیگر بلز میں اخباری ملازمین (شرائطِ ملازمت)، زکوٰۃ و عشر، نیشنل آرکائیوز اور نیا پاکستان ہاؤسنگ اینڈ ڈویلپمنٹ اتھارٹی سے متعلق ترامیمی بلز شامل ہیں۔

تعلیمی اور میڈیا کے شعبوں میں بہتری کے لیے ‘دانش یونیورسٹی اسلام آباد بل 2026’ اور ‘ایسوسی ایٹڈ پریس آف پاکستان کارپوریشن (ترمیمی) بل’ کی بھی توثیق کی گئی ہے۔ اس کے علاوہ صدرِ مملکت نے بلوچستان کے کوٹہ پر اعزاز اسلم ڈار کو فیڈرل پبلک سروس کمیشن (FPSC) کا رکن مقرر کرنے کی منظوری دی ہے۔

صدرِ مملکت نے پروفیسر سرور محمد خواجہ، راشد ملک اور زین العابدین احسن کو ان کی گراں قدر خدمات کے اعتراف میں ‘ستارہِ امتیاز’ سے نوازنے کا فیصلہ کیا ہے۔ مزید برآں، عید الفطر اور یومِ پاکستان 2026 کے موقع پر انسانی ہمدردی کی بنیاد پر قیدیوں کی سزاؤں میں خصوصی کمی کی بھی منظوری دے دی گئی ہے، جس سے سینکڑوں قیدیوں کو ریلیف ملے گا۔