نیدرلینڈز کی ایئر لائن کی پرواز میں پاور بینک پھٹ گیا، ایک مسافر زخمی

نیدرلینڈز کی قومی ایئر لائن کے طیارے میں دورانِ پرواز پاور بینک پھٹنے سے شدید دھماکہ ہوا جس کے نتیجے میں ایک مسافر زخمی ہو گیا جبکہ جہاز کے کیبن میں یکدم دھواں پھیل گیا۔ ایوی ایشن حکام کے مطابق یہ خطرناک واقعہ بحرِ اوقیانوس کے اوپر پرواز کے دوران اس وقت پیش آیا جب ایک مسافر کا پاور بینک اچانک شارٹ سرکٹ کی وجہ سے پھٹ گیا۔

پاور بینک پھٹنے سے پیدا ہونے والے دھوئیں کے باعث طیارے میں ہنگامی صورتحال پیدا ہو گئی، تاہم فلائٹ کریو (عملے) نے فوری طور پر کارروائی کرتے ہوئے آگ اور دھوئیں پر قابو پایا۔ حالات کی نزاکت کو مدنظر رکھتے ہوئے پائلٹ نے طیارے کو واپس ایمسٹرڈیم کے اسخیپول (Schiphol) ایئرپورٹ موڑ لیا جہاں لینڈنگ کی پیشگی تیاریوں کے ساتھ طیارے کو بحفاظت اتار لیا گیا۔ ایمرجنسی لینڈنگ کے بعد زخمی مسافر کو فوری طبی امداد فراہم کی گئی جبکہ ایئرلائن اور سول ایوی ایشن حکام کی جانب سے واقعے کی مزید تحقیقات جاری ہیں۔