نواز شریف دورہ قطر سے واپسی پر چھانگلہ گلی پہنچ گئے

پاکستان مسلم لیگ (ن) کے صدر اور سابق وزیراعظم میاں محمد نواز شریف قطر کا اپنا ایک روزہ مختصر اور اہم دورہ مکمل کرنے کے بعد اسلام آباد پہنچے، جہاں سے وہ براستہ ایکسپریس وے اپنی رہائش گاہ چھانگلہ گلی (گلیات) کے لیے روانہ ہو گئے۔ ذرائع کے مطابق میاں محمد نواز شریف گزشتہ چند روز سے گلیات کے خوبصورت پہاڑی مقام چھانگلہ گلی میں قیام پذیر ہیں اور قطر روانگی کے لیے وہ آج صبح ہی وہاں سے وفاقی دارالحکومت اسلام آباد آئے تھے۔

اسلام آباد پہنچنے کے بعد میاں محمد نواز شریف، وزیراعظم میاں شہباز شریف کے ہمراہ خصوصی پرواز کے ذریعے قطر روانہ ہوئے تھے۔ خلیجی ملک کا یہ ایک روزہ دورہ مکمل کرنے کے بعد وہ واپس اسلام آباد لینڈ ہوئے اور وہاں سے سڑک کے راستے مری ایکسپریس وے کو استعمال کرتے ہوئے دوبارہ چھانگلہ گلی منتقل ہو گئے ہیں، جہاں وہ اپنی بقیہ چھٹیاں اور قیام جاری رکھیں گے۔