شہباز شریف سے یو این سیکرٹری جنرل کی امیدوار مشیل باشلیٹ کی ملاقات

وزیرِ اعظم شہباز شریف سے اقوامِ متحدہ کے سیکرٹری جنرل کے عہدے کی امیدوار مشیل باشلیٹ نے ملاقات کی، جس میں نائب وزیرِ اعظم و وزیرِ خارجہ اسحاق ڈار بھی موجود تھے۔ وزیرِ اعظم نے مشیل باشلیٹ کا پاکستان آمد پر خیرمقدم کرتے ہوئے کثیرالجہتی تعاون کے فروغ اور عالمی چیلنجز سے نمٹنے میں اقوامِ متحدہ کے مرکزی کردار کے لیے پاکستان کی پختہ حمایت کا اعادہ کیا۔ انہوں نے واضح کیا کہ پاکستان اقوامِ متحدہ کے منشور کے مقاصد اور اصولوں کی پاسداری، عالمی قراردادوں پر مؤثر عمل درآمد اور امن، ترقی اور انسانی حقوق کے شعبوں میں متوازن پیش رفت کا خواہاں ہے۔ ملاقات کے دوران مشیل باشلیٹ نے اقوامِ متحدہ کے فورم پر پاکستان کی تاریخی اور گراں قدر خدمات کو سراہتے ہوئے علاقائی و بین الاقوامی امن و سلامتی کے فروغ کے لیے پاکستان کی مسلسل اور مؤثر کاوشوں کی تعریف کی۔