وزیراعظم کی بوسنیا کے صدارتی کونسل کے چیئرمین سے ملاقات، عالمی امور پر تبادلہ خیال

وزیراعظم محمد شہباز شریف نے اقوام متحدہ کی جنرل اسمبلی کے 81ویں اجلاس کے موقع پر نیویارک میں بوسنیا و ہرزیگووینا کی صدارتی کونسل کے چیئرمین ڈاکٹر ڈینس بیچیرووچ سے ایک اہم ملاقات کی۔ ملاقات کے دوران دونوں رہنماؤں نے پاک-بوسنیا دوطرفہ تعلقات کے تمام ابعاد کا تفصیلی جائزہ لیا، جن میں سیاسی و اقتصادی تعاون، دفاعی شراکت داری، ہنرمند افرادی قوت کا تبادلہ، تعلیم اور ثقافت کے شعبے شامل ہیں۔ اس موقع پر دونوں رہنماؤں نے باہمی دلچسپی کے علاقائی و عالمی سیکیورٹی امور پر بھی تبادلہ خیال کیا۔

وزیراعظم شہباز شریف نے بوسنیا کے ساتھ پاکستان کے تاریخی اور برادرانہ تعلقات کو اجاگر کرتے ہوئے انہیں تجارت اور معاشی تعاون پر مبنی مضبوط شراکت داری میں تبدیل کرنے کی خواہش ظاہر کی۔ انہوں نے بوسنیا و ہرزیگووینا کی خودمختاری اور علاقائی سالمیت کے لیے پاکستان کی مسلسل حمایت کا اعادہ کیا اور یورپی یونین کے ساتھ مذاکرات کے باضابطہ آغاز پر مبارکباد دی۔ وزیراعظم نے کہا کہ پاکستان بوسنیا کو یورپی اور مغربی بلقان کی منڈیوں تک پاکستانی مصنوعات کی رسائی کا اہم مرکز سمجھتا ہے۔ دوسری جانب، ڈاکٹر ڈینس بیچیرووچ نے مشرقِ وسطیٰ میں کشیدگی کم کرنے کے لیے پاکستان کے ثالثی کردار کی تعریف کی اور سندھ طاس معاہدے کی معطلی کے معاملے پر پاکستان کے موقف کی مکمل حمایت کی۔ دونوں رہنماؤں نے باہمی رابطے جاری رکھنے اور اعلیٰ سطح کے تبادلوں کو فروغ دینے پر اتفاق کیا۔