وزیراعظم کی قومی ترقیاتی منصوبوں کو بروقت اعلیٰ معیار کیساتھ مکمل کرنے کی ہدایت

وزیراعظم محمد شہباز شریف سے وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال نے ایک اہم ملاقات کی، جس میں ملک بھر میں جاری ترقیاتی منصوبوں اور پبلک سیکٹر ڈویلپمنٹ پروگرام (پی ایس ڈی پی) کی پیشرفت کا تفصیلی جائزہ لیا گیا۔ ملاقات کے دوران وفاقی وزیر نے وزیراعظم کو جاری منصوبوں کے مراحل، ان پر ہونے والے کام کی رفتار اور مستقبل کے لائحہ عمل سے آگاہ کیا۔ اس موقع پر وزیراعظم شہباز شریف نے ہدایت کی کہ قومی اہمیت کے تمام ترقیاتی منصوبوں کو اعلیٰ معیار کو برقرار رکھتے ہوئے مقررہ مدت کے اندر ہر صورت مکمل کیا جائے، کیونکہ عوامی فلاح و بہبود، روزگار کی فراہمی اور پائیدار معاشی ترقی کے لیے ان منصوبوں کی بروقت تکمیل حکومت کی اولین ترجیح ہے۔ وزیراعظم نے تمام متعلقہ وزارتوں اور اداروں کو باہمی تعاون بڑھانے اور منصوبوں پر عملدرآمد کی رفتار مزید تیز کرنے کی تاکید کی تاکہ ان کے ثمرات بلا تاخیر عوام تک پہنچ سکیں۔