پاکستان میں دہشتگردی کے پیچھے بھارت کا ہاتھ، ہمسایہ ملک وسائل فراہم کر رہا ہے: وزیراعظم

وزیراعظم شہباز شریف نے بلوچستان نیشنل ورکشاپ کے شرکاء سے خطاب کرتے ہوئے کہا ہے کہ پاکستان میں دہشت گردی کے پیچھے بھارت کا ہاتھ ہے جو ان عناصر کو وسائل فراہم کر رہا ہے۔ انہوں نے کہا کہ 2018 میں ختم ہو جانے والی دہشت گردی کو ایک سازش کے تحت دوبارہ فعال کیا گیا اور افغان حکومت بھی اپنی سرزمین پاکستان کے خلاف استعمال ہونے سے روکنے میں ناکام رہی ہے۔ وزیراعظم نے بتایا کہ وفاق اور پنجاب نے بلوچستان کی ترقی کے لیے بالترتیب 50 ارب اور 150 ارب روپے سے زائد کے فنڈز دیے ہیں، جبکہ 300 ارب روپے کی لاگت سے کراچی تا چمن دو رویہ شاہراہ کی تعمیر جاری ہے جو 2 سال میں مکمل ہو گی۔ انہوں نے مستونگ حملے میں سیشن جج کی شہادت پر افسوس ظاہر کرتے ہوئے 90,000 پاکستانی شہداء کی قربانیوں کو خراجِ تحسین پیش کیا۔