آئی ٹی برآمدات 4.6 ارب ڈالر تک پہنچ گئیں، وزیراعظم کی ٹیم کو شاباش

وزیراعظم محمد شہباز شریف کی زیر صدارت آئی ٹی شعبے کے سٹریٹیجک روڈ میپ پر جائزہ اجلاس منعقد ہوا، جس میں ملک کی سالانہ آئی ٹی برآمدات 21 فیصد اضافے کے ساتھ 4.6 ارب امریکی ڈالر تک پہنچنے پر وزیراعظم نے وزیر انفارمیشن ٹیکنالوجی شزہ فاطمہ خواجہ اور ان کی پوری ٹیم کی کارکردگی کو سراہا۔ وزیراعظم نے کہا کہ برآمدات میں یہ تاریخی اضافہ ڈیجیٹل معیشت کی ترقی کے لیے حکومت کی کامیاب پالیسیوں کا ثمر ہے اور اس شعبے کی ترقی حکومت کی اولین ترجیحات میں شامل ہے۔ انہوں نے آئی ٹی ٹریننگ پروگرامز کی تھرڈ پارٹی ویلیڈیشن یقینی بنانے اور معیار پر سمجھوتہ نہ کرنے کی سخت ہدایت کی۔

اجلاس کو بریفنگ میں بتایا گیا کہ  جون 2025 میں 274 میگا ہرٹز سے بڑھ کر جون 2026 میں 880 میگا ہرٹز ہو گئی ہے، جس سے کنیکٹیویٹی اور انٹرنیٹ سپیڈ میں غیر معمولی بہتری آئے گی۔ ملک میں سمارٹ فون صارفین کا تناسب 2024 کے 62 فیصد سے بڑھ کر جون 2026 میں 72 فیصد تک پہنچ گیا ہے، جبکہ 51 لاکھ گھروں کو فکسڈ براڈ بینڈ اور فائبر کنکشن مہیا کیے جا چکے ہیں۔ گزشتہ مالی سال آئی ٹی برآمدات میں فری لانسرز نے 1 ارب 16 کروڑ 47 لاکھ ڈالر کا شاندار حصہ ڈالا۔ گزشتہ برس 9 لاکھ 42 ہزار سے زائد تربیتی سرٹیفکیٹس جاری کیے گئے اور چینی کمپنی علی بابا کے ساتھ مفاہمتی یادداشت کے تحت وفاقی اداروں میں مصنوعی ذہانت (AI) کے منصوبوں پر کام جاری ہے۔

اس کے علاوہ “کنیکٹ پاکستان وژن 2030” کی تیاریاں آخری مراحل میں ہیں اور باغ، آزاد جموں و کشمیر میں سافٹ ویئر ٹیکنالوجی پارک کی تعمیر مکمل ہو چکی ہے۔ اجلاس میں وفاقی وزراء، گورنر سٹیٹ بینک اور دیگر اعلیٰ حکام نے شرکت کی۔