ڈالر کے مقابلے میں روپیہ مزید مضبوط، مسلسل 46واں دن بہتری برقرار

انٹربینک اور اوپن مارکیٹ میں ڈالر کے مقابلے میں روپے کی قدر میں بہتری کا سلسلہ جمعہ کو بھی برقرار رہا، اور زرمبادلہ کی دونوں مارکیٹوں میں مسلسل 46ویں روز بھی روپیہ ڈالر کے مقابلے میں مزید مستحکم ہوا۔

خام تیل کی عالمی قیمتوں میں کمی، فوڈ ایگ نمائش میں 641 ملین ڈالر کے برآمدی معاہدے، اور بحرین کی کمپنیوں کی پاکستان کے آئی ٹی، زراعت، توانائی اور معدنیات کے شعبوں میں مجوزہ جوائنٹ وینچرز نے مارکیٹ کے رجحان کو مثبت رکھا۔
اس کے علاوہ خصوصی سرمایہ کاری سہولت کونسل (SIFC) کے تحت آسٹریلیا کے ساتھ توانائی ٹیکنالوجی اور معدنیات میں متوقع سرمایہ کاری نے بھی سرمایہ کاروں کا اعتماد بڑھایا۔

انٹربینک میں ایک موقع پر ڈالر 22 پیسے کمی کے بعد 280 روپے 33 پیسے تک نیچے آیا، تاہم درآمدی ادائیگیوں کے دباؤ کے باعث کاروبار کے اختتام پر ڈالر مزید 3 پیسے کمی کے ساتھ 280 روپے 52 پیسے پر بند ہوا۔
اوپن مارکیٹ میں بھی ڈالر 4 پیسے سستا ہوکر 281 روپے 56 پیسے پر بند ہوا۔