سانحہ پمز: وفاقی پولیس کی انکوائری رپورٹ مکمل، آئی جی اسلام آباد کو جمع

وفاقی پولیس نے سانحہ پمز (PIMS Tragedy) سے متعلق اپنی تحریری انکوائری رپورٹ مکمل کر کے آئی جی اسلام آباد کو جمع کرا دی ہے، جسے حتمی منظوری اور کارروائی کے لیے وزارتِ داخلہ کو ارسال کیا جائے گا۔ ضابطہ فوجداری کی دفعہ 174 کے تحت تیار کی جانے والی اس رپورٹ میں نامزد افسران کے تحریری بیانات، ان کی لوکیشنز، پمز ہسپتال کی سی سی ٹی وی فوٹیج اور سیف سٹی کی فوٹیج کا عکس شامل کیا گیا ہے۔ پولیس نے سابق ای ڈی پمز عمران سکندر، پروفیسر ڈاکٹر سعدیہ، دیگر لیڈی ڈاکٹروں اور نومولود بچے کی جان بچانے والی نرس رضیہ پروین کا بیان بھی رپورٹ کا حصہ بنایا ہے۔ وزارتِ داخلہ کی حتمی اجازت کے بعد مقدمہ درج کرنے یا نہ کرنے کا فیصلہ کیا جائے گا۔