ہڑتال مؤخر:علی پرویز کا پٹرولیم ڈیلرز کے مارجن کا مسئلہ کابینہ میں اٹھانے کا اعلان

وفاقی وزیر مملکت برائے پٹرولیم علی پرویز ملک نے اعلان کیا ہے کہ پٹرولیم ڈیلرز کے مارجن کا مسئلہ حل کرنے کے لیے ا آئل اینڈ گیس ریگولیٹری اتھارٹی (اوگرا) کے ساتھ نشست کی جائے گی اور اس معاملے کی سمری وفاقی کابینہ میں پیش کی جائے گی۔ حکومتی یقین دہانی کے بعد پاکستان پٹرولیم ڈیلرز ایسوسی ایشن نے اپنی مجوزہ ملک گیر ہڑتال فی الحال مؤخر کر دی ہے۔

وفاقی دارالحکومت میں میڈیا سے گفتگو کرتے ہوئے علی پرویز ملک نے کہا کہ حکومت عوام کو درپیش مشکلات سے بخوبی آگاہ ہے اور ڈیلرز کے جائز مسائل کے حل کے لیے سنجیدہ اقدامات کیے جا رہے ہیں۔ انہوں نے کہا کہ حکومت کا مقصد پٹرولیم سپلائی چین کے نظام میں شفافیت لانا ہے، اور وہ آئندہ دو ہفتوں کے اندر ڈیلرز کے مطالبے کو منطقی انجام تک پہنچانے کے لیے ہر متعلقہ فورم پر آواز اٹھائیں گے۔

دوسری جانب پٹرول پمپ مالکان اور ڈیلرز ایسوسی ایشن نے حکومت کی جانب سے ملنے والی مثبت یقین دہانی پر اعتماد کا اظہار کیا ہے۔ ڈیلرز نمائندوں کا کہنا تھا کہ انہیں امید ہے کہ اگلے دو ہفتوں کے اندر مارجن میں اضافے کا دیرینہ مسئلہ حل ہو جائے گا، جس کی بنا پر عوامی سہولت کو مدنظر رکھتے ہوئے ہڑتال مؤخر کی جا رہی ہے۔