حکومت نے پیٹرول 14روپے92پیسے، ڈیزل15روپے فی لیٹر مہنگا کردیا

حکومت نے پیٹرولیم مصنوعات کی قیمتوں میں نمایاں اضافہ کردیا ہے جس کے بعد عوام پر مہنگائی کا مزید بوجھ پڑ گیا۔

پیٹرولیم ڈویژن کی جانب سے جاری اعلامیے کے مطابق ہائی اسپیڈ ڈیزل کی قیمت میں 15 روپے فی لیٹر اضافہ کیا گیا ہے، جس کے بعد ڈیزل کی نئی قیمت 414 روپے 58 پیسے فی لیٹر مقرر کردی گئی ہے۔

اسی طرح پیٹرول کی قیمت میں 14 روپے 92 پیسے فی لیٹر اضافہ کیا گیا، جس کے بعد پیٹرول کی نئی قیمت 414 روپے 78 پیسے فی لیٹر ہوگئی ہے۔

پیٹرولیم ڈویژن کے مطابق نئی قیمتوں کا اطلاق رات 12 بجے سے کردیا گیا ہے اور یہ قیمتیں ایک ہفتے کے لیے نافذ العمل رہیں گی۔

دوسری جانب ذرائع پیٹرولیم ڈویژن کا کہنا ہے کہ پیٹرول اور ڈیزل پر عائد لیوی میں بھی اضافہ کردیا گیا ہے۔

ذرائع کے مطابق پیٹرول پر لیوی 103 روپے 50 پیسے سے بڑھا کر 117 روپے 41 پیسے فی لیٹر کردی گئی ہے جبکہ ڈیزل پر لیوی 28 روپے 69 پیسے سے بڑھا کر 42 روپے 60 پیسے فی لیٹر مقرر کی گئی ہے۔