پشاور: فیڈرل کانسٹیبلری ہیڈ کوارٹرز خودکش حملے کی ابتدائی رپورٹ تیار

پشاور میں فیڈرل کانسٹیبلری ہیڈ کوارٹرز پر ہونے والے خودکش حملے کی ابتدائی پولیس رپورٹ سامنے آگئی ہے، جس کے مطابق پہلا خودکش حملہ آور پیدل سنہری مسجد روڈ کی جانب سے آکر مرکزی گیٹ کے سامنے پہنچا۔ حملہ آور نے چادر اوڑھ رکھی تھی اور اسی گیٹ پر اس نے خود کو دھماکے سے اُڑا لیا، جس کے نتیجے میں تین اہلکار موقع پر ہی شہید ہوگئے۔ رپورٹ کے مطابق دھماکے سے مرکزی گیٹ کو کوئی نقصان نہیں پہنچا۔

ابتدائی دھماکے کے فوراً بعد شلوار قمیض پہنے دو مزید خودکش حملہ آور سائیڈ گیٹ سے ایف سی ہیڈ کوارٹرز میں داخل ہوئے۔ دونوں کے پاس رائفلز اور ہینڈ گرینیڈ موجود تھے۔ اندر داخل ہونے کے بعد وہ دائیں طرف مڑے اور موٹر سائیکل اسٹینڈ کی جانب بڑھتے ہوئے فائرنگ کرتے رہے۔ تاہم جوابی فائرنگ میں دونوں حملہ آوروں کو 30 سے 40 میٹر کے فاصلے پر ہی ہلاک کر دیا گیا۔

رپورٹ کے مطابق دہشتگردوں کا مقصد اہلکاروں اور افسران کو یرغمال بنانا تھا، کیوں کہ ایف سی ہیڈ کوارٹرز میں اعلیٰ افسران بھی موجود ہوتے ہیں اور اس وقت پریڈ بھی جاری تھی۔ پولیس کے مطابق ایف سی ہیڈ کوارٹرز کو مکمل طور پر کلیئر کر دیا گیا ہے اور صورتحال پر قابو پا لیا گیا ہے۔