بگ بیش لیگ، بابراعظم اور اسٹیون اسمتھ کی موجودگی میں اسٹیڈیم کے باہر آگ لگ گئی

بگ بیش لیگ کے ایک سنسنی خیز میچ کے دوران پرتھ میں واقع اوپٹس اسٹیڈیم کے باہر آگ بھڑک اٹھی، جب میدان میں بابراعظم اور اسٹیون اسمتھ کھیل رہے تھے۔

یہ واقعہ سڈنی سکسرز اور پرتھ اسکورچرز کے درمیان میچ کے 15ویں اوور میں پیش آیا۔ اچانک اسٹیڈیم کے باہر موجود جھاڑیوں میں آگ لگ گئی جس سے اٹھنے والا دھواں اس قدر شدید تھا کہ گراؤنڈ کے اندر تک پھیل گیا۔

فائر الارم بجنے سے شائقین میں تشویش کی لہر دوڑ گئی، مگر انتظامیہ نے صورتحال کو کنٹرول میں رکھا اور میچ کو جاری رکھا گیا۔ کچھ دیر کے لیے شائقین کی نظریں کرکٹ سے ہٹ کر دھویں پر جم گئیں۔

اسٹیڈیم اسٹاف اور سیکیورٹی اہلکاروں نے فوری کارروائی کرتے ہوئے آگ پر قابو پا لیا۔ خوش قسمتی سے کسی کے زخمی ہونے کی اطلاع نہیں ملی۔

آگ لگنے کی وجوہات کے بارے میں مختلف آرا سامنے آ رہی ہیں اور متعلقہ حکام واقعے کی تحقیقات کر رہے ہیں۔