سندھ میں کل تک شدید بارشوں کا امکان، 23 اضلاع کیلئے موسمیاتی ایڈوائزری جاری

صوبہ سندھ میں 25 جولائی تک متوقع مون سون بارشوں کے پیشِ نظر پروونشل ڈساسٹر مینجمنٹ اتھارٹی (PDMA) نے 23 اضلاع کے لیے موسمیاتی ایڈوائزری جاری کر دی ہے۔ صورتحال کی سنگینی کو مدِنظر رکھتے ہوئے وزیراعلیٰ سندھ مراد علی شاہ نے صوبائی انتظامیہ کو مکمل الرٹ رہنے کا حکم دیتے ہوئے تمام متعلقہ محکموں کو احتیاطی و ہنگامی اقدامات فوری طور پر یقینی بنانے کی ہدایت کی ہے۔ انہوں نے خصوصاً شہری مراکز اور حساس علاقوں میں بارش کے پانی کی فوری نکاسی کا نظام فعال رکھنے اور انسانی جانوں کے تحفظ کو ہر قیمت پر یقینی بنانے کی تاکید کی ہے۔ وزیراعلیٰ نے متعلقہ اداروں کو ہدایت کی ہے کہ تمام متاثرہ مقامات کی مسلسل نگرانی کی جائے اور کسی بھی برے وقت سے نپٹنے کے لیے امدادی سامان اور آلات کی دستیابی کو یقینی بنایا جائے۔