پاکستان بزنس فورم کی حکومت سے دودھ کی قیمتوں پر کنٹرول اور ریگولیشن کا مطالبہ

اسلام آباد: پاکستان بزنس فورم (PBF) نے حکومت سے مطالبہ کیا ہے کہ دودھ والی کمپنیوں کی سرگرمیوں پر فوری ریگولیشن کی جائے تاکہ ڈیری مصنوعات عوام کی پہنچ میں رہیں۔

پی بی ایف کے مطابق اس وقت دودھ کی ریٹیل مارکیٹ میں قیمت فی لیٹر 360 سے 380 روپے کے درمیان ہے، جبکہ اگر جی ایس ٹی ختم بھی کر دی جائے تو قیمت 305 سے 315 روپے کے درمیان رہ جاتی ہے۔ چیف آرگنائزر احمد جواد کے مطابق دودھ کی خریداری اور لاجسٹکس چارجز ملا کر فی لیٹر قیمت 180 روپے بنتی ہے۔

پی بی ایف نے بھارت اور بنگلہ دیش کے ٹیٹرا پیک دودھ کی قیمت کا حوالہ دیتے ہوئے بتایا کہ وہاں فی لیٹر قیمت پاکستانی روپے میں 250 سے 270 کے درمیان ہے، جبکہ پاکستان میں معروف کمپنیوں کی سال 2025 میں آمدنی 60 سے 100 ارب روپے کے درمیان رہی۔

احمد جواد نے کہا کہ حکومت ڈیری مصنوعات پر جی ایس ٹی کی شرح 7 فیصد کرے اور فوری مداخلت کے ذریعے ٹیٹرا پیک دودھ کی قیمت میں فی لیٹر 50 روپے کمی یقینی بنائے۔ پی بی ایف نے واضح کیا کہ حکومتی وعدے مہنگائی کم کرنے کے لیے کافی نہیں، جب کہ دودھ جیسی بنیادی ضرورت عوام کی پہنچ سے دور ہو۔