شکاگو میں مقیم پاکستانی ریسٹورنٹ مالک اہلِ خانہ کی اپیل کے باوجود پاکستان ڈی پورٹ

امریکا کے شہر شکاگو کے علاقے ہمبولٹ پارک میں سب شاپ کے مالک آصف امین چیمہ کو اہلِ خانہ کی آخری اپیل کے باوجود پاکستان ڈی پورٹ کر دیا گیا۔ 63 سالہ آصف امین چیمہ کو جمعرات کی شام ایک پرواز کے ذریعے پاکستان روانہ کر دیا گیا ۔

اہلِ خانہ کے مطابق چیمہ دہائیوں سے شکاگو میں مقیم تھے، جہاں انہوں نے خاندان بسایا اور Best Sub #2 کے نام سے ریسٹورنٹ چلاتے رہے۔ ان کی بیٹیوں نے ملک بدری روکنے کی آخری کوشش کی، تاہم وہ کامیاب نہ ہو سکیں۔

خاندان کا کہنا ہے کہ اگرچہ آصف امین چیمہ کے پاس ورک پرمٹ تھا، تاہم انہیں 1990 کی دہائی میں جاری کیے گئے ڈی پورٹیشن آرڈر کا علم نہیں تھا۔ ستمبر میں انہیں امریکی امیگریشن حکام نے گرفتار کیا تھا۔

گزشتہ ماہ اوہیر ایئرپورٹ پر روانگی سے قبل طبیعت خراب ہونے پر عارضی طور پر ملک بدری روکی گئی، تاہم بعد میں اپیل کورٹ نے اسٹی آف ریموول کی درخواست مسترد کر دی۔

اہلِ خانہ نے حراست کے دوران ادویات نہ ملنے کا الزام لگایا، جسے محکمہ ہوم لینڈ سیکیورٹی نے مسترد کرتے ہوئے کہا کہ چیمہ کو مکمل طبی سہولت فراہم کی گئی۔