ملک کے کئی شہروں میں شدید گرمی کا الرٹ، ہیٹ سٹروک کا خدشہ

محکمہ موسمیات نے ملک کے مختلف علاقوں میں شدید گرمی کی لہر اور ہیٹ سٹروک کے بڑھتے ہوئے خطرے کے پیش نظر ہائی الرٹ جاری کر دیا ہے۔ تازہ ترین رپورٹ کے مطابق پشاور، کوئٹہ، بہاولنگر، ڈی آئی خان اور جوہرآباد میں حقیقی درجہ حرارت 40 سے 42 ڈگری سینٹی گریڈ ریکارڈ کیا گیا، تاہم ہوا میں نمی کے باعث ان شہروں میں گرمی کی شدت (ہیٹ انڈیکس) 54 ڈگری سینٹی گریڈ سے بھی زائد محسوس کی جا رہی ہے۔ اسی طرح سرگودھا میں درجہ حرارت 40.5 ڈگری جبکہ محسوس درجہ حرارت 52.8 ڈگری تک پہنچ گیا ہے، جبکہ گوجرانوالہ اور کوٹ ادو میں بھی محسوس درجہ حرارت 52.5 ڈگری سینٹی گریڈ ریکارڈ کیا گیا۔

محکمہ موسمیات کے اعداد و شمار کے مطابق اوکاڑہ میں درجہ حرارت 40.5 ڈگری اور ہیٹ انڈیکس 51.5 ڈگری رہا، جبکہ اٹک میں درجہ حرارت 38 ڈگری اور محسوس درجہ حرارت 49.8 ڈگری تک جا پہنچا۔ وفاقی دارالحکومت اسلام آباد میں درجہ حرارت 38 ڈگری اور محسوس درجہ حرارت 49.2 ڈگری، جبکہ فیصل آباد میں درجہ حرارت 40 ڈگری اور محسوس درجہ حرارت 48.3 ڈگری ریکارڈ کیا گیا۔ مزید برآں، سیالکوٹ میں درجہ حرارت 36 ڈگری اور ہوا میں نمی کا تناسب 58 فیصد رہا، حیدرآباد میں محسوس درجہ حرارت 45.9 ڈگری اور کراچی میں درجہ حرارت 33 ڈگری جبکہ محسوس درجہ حرارت 38.1 ڈگری ریکارڈ کیا گیا۔ محکمہ موسمیات نے خبردار کیا ہے کہ ہیٹ انڈیکس کے غیر معمولی اضافے کی وجہ سے ہیٹ اسٹروک کا شدید خطرہ موجود ہے، اس لیے عوام اور متعلقہ اداروں کو انتہائی محتاط رہنے اور فوری احتیاطی تدابیر اختیار کرنے کی سخت ہدایت کی گئی ہے۔