پاک امریکا تعلقات پائیدار شراکت داری کی ضرورت ہیں، سفیر پاکستان رضوان سعید شیخ

واشنگٹن ڈی سی میں سفیر پاکستان رضوان سعید شیخ نے امریکا کے معروف تھنک ٹینکس کے اراکین سے ملاقات کی، جس میں امریکی فکری حلقوں کے اہم نمائندوں نے شرکت کی۔ ملاقات کے دوران پاک امریکا دوطرفہ تعلقات، عالمی اور علاقائی صورتحال پر تفصیلی تبادلہ خیال کیا گیا۔

سفیر پاکستان نے اہم علاقائی اور بین الاقوامی امور پر پاکستان کا مؤقف امریکی فکری برادری کے سامنے پیش کرتے ہوئے کہا کہ 2025 پاک امریکا تعلقات کے حوالے سے کلیدی تبدیلیوں کا سال ثابت ہوا ہے۔ ان کا کہنا تھا کہ دونوں ممالک کے تعلقات محض وقتی یا اختیاری نہیں بلکہ مستقبل کی ایک ناگزیر ضرورت ہیں۔

رضوان سعید شیخ نے کہا کہ علاقائی اور عالمی امن و استحکام کے لیے پاکستان نے ہمیشہ فعال اور تعمیری کردار ادا کیا ہے اور دونوں ملکوں کی شراکت داری نہ صرف باہمی مفادات بلکہ عالمی امن کے لیے بھی نتیجہ خیز رہی ہے۔

انہوں نے معدنیات، توانائی اور آئی ٹی کے شعبوں میں تعاون کو دوطرفہ تعلقات کی نئی جہت قرار دیتے ہوئے کہا کہ پاکستان کم لاگت اور بہتر معیار کی بدولت خطے میں مسابقتی برتری رکھتا ہے، جس سے امریکی سرمایہ کار بھرپور فائدہ اٹھا سکتے ہیں۔

سفیر پاکستان نے افغانستان سے جنم لینے والی دہشت گردی، مئی 2025 کی بھارتی جارحیت، مسئلہ کشمیر اور سندھ طاس معاہدے پر بھی پاکستان کا واضح مؤقف پیش کیا۔