پاک امریکہ سکیورٹی تعاون پر محسن نقوی کی امریکی وفد سے ملاقات

اسلام آباد: وفاقی وزیر داخلہ محسن نقوی نے امریکی سفیر نیٹلی بیکر کی قیادت میں اعلیٰ سطح کے وفد سے ملاقات کی، جس میں پاک امریکہ تعلقات اور مشترکہ سکیورٹی تعاون کے شعبوں میں تبادلہ خیال کیا گیا۔

ملاقات میں دونوں فریقین نے بارڈر مینجمنٹ، انسداد دہشت گردی، نارکوٹکس کنٹرول، اور ایف آئی اے اور فیڈرل کانسٹیبلری کی استعداد کار بڑھانے کے لیے تعاون کو مزید مضبوط بنانے پر اتفاق کیا۔ امریکی معاونت سے ایف آئی اے میں سنٹر فار ٹرانسفارمیشن کرائم اور اکیڈمی کے قیام کے امور پر بھی بات ہوئی۔

وفاقی وزیر داخلہ نے کہا کہ جدید سافٹ ویئر کے ذریعے بیرون ملک جرائم میں ملوث افراد کی شناخت کی جائے گی اور غیرقانونی کال سینٹرز، مالیاتی فراڈ اور دہشت گردی کی فنڈنگ کی روک تھام کے لیے موثر اقدامات کیے جائیں گے۔

امریکی وفد نے پاکستان کی کوششوں کو سراہا اور مزید دوطرفہ تعاون جاری رکھنے کا عزم ظاہر کیا۔ ملاقات میں مختلف وفاقی اداروں اور پولیس کے اعلیٰ حکام بھی موجود تھے۔