جموں و کشمیر بھارت کا اٹوٹ انگ ہے نہ داخلی معاملہ، متنازع علاقہ ہے: پاکستان

اقوام متحدہ کی سلامتی کونسل کے اجلاس کے دوران پاکستان نے بھارت کو منہ توڑ جواب دیتے ہوئے واضح کیا ہے کہ مقبوضہ جموں و کشمیر نہ تو بھارت کا ‘اٹوٹ انگ’ ہے اور نہ ہی اس کا کوئی داخلی معاملہ ہے۔ پاکستانی وفد نے موقف اپنایا کہ بھارت کا سلامتی کونسل کے پلیٹ فارم سے امن و آشتی کے دروس دینا نہایت مضحکہ خیز ہے۔

اقوام متحدہ میں پاکستانی مشن کی قونصلر صائمہ سلیم نے بھارتی الزامات کا جواب دیتے ہوئے یاد دہانی کرائی کہ بھارت خود مسئلہ کشمیر کو سلامتی کونسل میں لے کر آیا تھا، مگر آج وہی بھارت عالمی برادری اور اقوام متحدہ کی منظور شدہ قراردادوں سے منحرف ہو رہا ہے۔ انہوں نے کہا کہ بھارتی انکار یا یکطرفہ اقدامات سے کشمیر تنازع کی بین الاقوامی حیثیت اور تسلیم شدہ نوعیت تبدیل نہیں ہو سکتی، جبکہ مقبوضہ وادی میں کشمیریوں پر جبر، تشدد اور انسانی حقوق کی سنگین پامالیاں مسلسل جاری ہیں۔

قونصلر صائمہ سلیم نے سندھ طاس معاہدے کی معطلی سے متعلق بھارتی فیصلوں اور دھمکیوں کو عالمی قوانین کی صریح خلاف ورزی قرار دیا۔ ان کا کہنا تھا کہ دریائے سندھ کا پانی کروڑوں انسانوں کی زندگی کا بنیادی ذریعہ ہے، اسے کسی صورت جنگ یا سیاسی ہتھیار کے طور پر استعمال نہیں کیا جا سکتا۔

پاکستانی قونصلر نے بھارتی چہرے سے نقاب اٹھاتے ہوئے مزید کہا کہ بھارت سے جڑے دہشت گردی کے نیٹ ورکس اب محض علاقائی نہیں بلکہ عالمی سطح تک پھیل چکے ہیں۔ بھارت کے اندر ہندوتوا کے انتہا پسندانہ نظریات نے اسلاموفوبیا اور اقلیتوں پر ظلم و ستم کو باقاعدہ ایک ریاستی پالیسی کا درجہ دے دیا ہے۔