اسحاق ڈار کا دورہ متحدہ عرب امارات، 3 ارب ڈالر قرض پر بات چیت

نائب وزیراعظم اور وزیر خارجہ اسحاق ڈار متحدہ عرب امارات کے دورے پر ہیں، جہاں پاکستان اور یو اے ای کے درمیان 3 ارب ڈالر قرض کے معاملات پر بات چیت جاری ہے۔

ذرائع کے مطابق پاکستان چاہتا ہے کہ یہ قرض سرمایہ کاری میں تبدیل کیا جائے۔ یو اے ای کی کمپنی اتصالات کے ساتھ پاکستان میں سرمایہ کاری کے مواقع بھی زیر غور ہیں۔

ابتدائی طور پر یو اے ای حکام ایک ارب ڈالر کے رول اوور کے لیے پاکستان سے پہلے ہی رابطے میں تھے، جس کے بدلے پاکستانی کمپنی کے کچھ شیئرز دیے جائیں گے اور ایک ارب ڈالر کی واجب الادا رقم ختم ہو جائے گی۔

باقی دو ارب ڈالر کے رول اوور سے متعلق بھی اماراتی حکام کے ساتھ بات چیت ہوگی۔