پاکستان اور ترکیہ کے درمیان عدالتی تعاون کے فروغ کیلئے مفاہمتی یادداشت پر دستخط

پاکستان اور ترکیہ کے درمیان عدالتی تعاون کو مزید مستحکم کرنے کے لیے ایک اہم مفاہمتی یادداشت (MoU) پر دستخط کی تقریب منعقد ہوئی، جس کا مقصد دونوں برادر ممالک کے عدالتی نظام کے درمیان تجربات کا تبادلہ اور باہمی اشتراک کو فروغ دینا ہے۔ سپریم کورٹ آف پاکستان میں منعقدہ اس تقریب میں چیف جسٹس آف پاکستان یحییٰ آفریدی اور ترکیہ کی آئینی عدالت کے اعلیٰ سطح وفد سمیت دونوں ممالک کے سینئر ججز اور حکام نے شرکت کی۔ تقریب کے آغاز میں دونوں ممالک کے قومی ترانے بجائے گئے۔

چیف جسٹس یحییٰ آفریدی نے ترک وفد کا خیرمقدم کرتے ہوئے اس دورے کو تاریخی اور برادرانہ تعلقات کی علامت قرار دیا۔ انہوں نے خاص طور پر ترکیہ کے عدالتی نظام میں جدت اور مصنوعی ذہانت (AI) کے مؤثر استعمال کی تعریف کرتے ہوئے کہا کہ بدلتی ہوئی دنیا میں عدالتی نظام تنہا کام نہیں کر سکتا، اس لیے ہمیں ایک دوسرے کے جدید تجربات سے فائدہ اٹھانا چاہیے۔ چیف جسٹس نے اس امید کا اظہار کیا کہ یہ مفاہمتی یادداشت قانون کی حکمرانی کو مضبوط بنانے اور دونوں ملکوں کی عدلیہ کے درمیان تعاون کی نئی راہیں کھولنے میں کلید ثابت ہوگی۔