پاکستان نے ٹی20 ٹرائی نیشن سیریز جیت لی، فائنل میں سری لنکا کو 6 وکٹوں سے شکست

ٹی20 ٹرائی نیشن سیریز کا فائنل پاکستان کے نام رہا، گرین شرٹس نے راولپنڈی اسٹیڈیم میں سری لنکا کو 6 وکٹوں سے ہرا کر ٹائٹل اپنے نام کرلیا۔ محمد نواز پلیئرآف دی میچ اور پلیئرآف دی سیریز قرار۔

فائنل میں سری لنکا نے پہلے بیٹنگ کرتے ہوئے 115 رنز کا ہدف دیا، جو پاکستان نے 8 گیندیں پہلے حاصل کرلیا۔ ہدف کے تعاقب میں اوپنرز صاحبزادہ فرحان اور صائم ایوب نے پراعتماد آغاز فراہم کیا اور 7.3 اوورز میں 46 رنز کی شراکت قائم کی۔
صاحبزادہ فرحان 23 رنز بنا کر آؤٹ ہوئے جبکہ صائم ایوب نے 6 چوکوں کی مدد سے 36 رنز اسکور کیے۔ کپتان سلمان آغا 14 رنز بنا سکے جبکہ فخر زمان صرف 3 رنز تک محدود رہے۔
بابر اعظم 37 اور عثمان خان 3 رنز کے ساتھ ناٹ آؤٹ رہے اور ٹیم کو کامیابی دلائی۔

اس سے قبل پاکستان نے ٹاس جیت کر فیلڈنگ کا فیصلہ کیا۔ سری لنکا کا آغاز بہتر رہا اور 84 رنز پر صرف ایک وکٹ گری، تاہم پاکستانی بولرز نے تباہ کن کم بیک کرتے ہوئے صرف 30 رنز کے اضافے پر باقی 9 وکٹیں اڑا دیں۔ سری لنکا کی پوری ٹیم 114 رنز پر آؤٹ ہوئی۔
کامل مشرا 59 رنز کے ساتھ نمایاں رہے، جنہوں نے 4 چھکے اور 2 چوکے لگائے۔

پاکستان کی جانب سے شاہین آفریدی اور محمد نواز نے 3، 3 وکٹیں حاصل کیں، ابرار احمد نے 2 جبکہ سلمان مرزا اور صائم ایوب نے ایک ایک وکٹ اپنے نام کی۔
فائنل کے لیے ایک تبدیلی کی گئی جس کے تحت شاہین آفریدی ٹیم میں واپس آئے جبکہ وسیم جونیئر ڈراپ ہوئے۔ سری لنکا نے گزشتہ میچ والی ٹیم برقرار رکھی۔

ٹاس کے موقع پر کپتان سلمان علی آغا نے کہا کہ وکٹ عام پنڈی پچ جیسی نہیں، لیکن 160-170 کا اسکور قابلِ دفاع ہوسکتا ہے۔ سری لنکن کپتان داسن شاناکا نے سرد موسم کو غیر اہم قرار دیتے ہوئے کہا کہ ٹیم ایسی کنڈیشنز کی عادی ہے۔
سری لنکا نے زمبابوے اور پھر پاکستان کو شکست دے کر فائنل میں جگہ بنائی تھی۔ میچ سے ایک روز قبل دونوں کپتانوں نے مقامی ہوٹل میں ٹرافی کے ہمراہ تصاویر بھی بنوائیں۔