کراچی: ٹیکسٹائل برآمدات کی تنزلی، سالانہ ہدف خطرے میں، اپٹما نے وفاقی وزیر تجارت کو ہنگامی خط لکھ دیا

کراچی: ٹیکسٹائل برآمدات میں نمایاں کمی کے باعث پاکستان کا سالانہ برآمدی ہدف خطرے میں پڑ گیا ہے۔ اس صورتحال پر آل پاکستان ٹیکسٹائل ملز ایسوسی ایشن (اپٹما) نے تشویش کا اظہار کرتے ہوئے وفاقی وزیرِ تجارت کو ہنگامی خط ارسال کر دیا ہے۔

اپٹما کے خط میں مطالبہ کیا گیا ہے کہ امریکی کپاس سے تیار کی جانے والی مصنوعات پر عائد ڈیوٹی ختم کی جائے تاکہ پاکستانی ٹیکسٹائل مصنوعات عالمی منڈی میں مسابقتی حیثیت برقرار رکھ سکیں۔ خط میں کہا گیا ہے کہ بنگلہ دیش کو امریکی کپاس سے تیار مصنوعات پر صفر ٹیرف کی سہولت حاصل ہے، لہٰذا پاکستان کو بھی مساوی سہولت فراہم کی جائے تاکہ برآمد کنندگان کو نقصان سے بچایا جا سکے۔

ایسوسی ایشن نے وزارتِ تجارت سے مطالبہ کیا ہے کہ وہ ہنگامی بنیادوں پر اپٹما کے وفد سے ملاقات کرے اور فوری عملی اقدامات کرے تاکہ امریکی منڈی میں پاکستانی ٹیکسٹائل مصنوعات کو فروغ دیا جا سکے۔

اپٹما نے خبردار کیا ہے کہ اگر برآمدات میں کمی کا رجحان جاری رہا تو ملکی ٹیکسٹائل شعبے کو سنگین اقتصادی نقصان کا سامنا کرنا پڑ سکتا ہے، جس کے اثرات روزگار اور مجموعی معیشت پر بھی مرتب ہوں گے۔