پاکستان سٹاک ایکسچینج میں کاروباری ہفتے کے پہلے روز مندی کا رجحان

کراچی: پاکستان اسٹاک ایکسچینج میں کاروباری ہفتے کے پہلے روز کاروبار مثبت زون میں شروع ہوا، تاہم بعد ازاں فروخت کے دباؤ کی وجہ سے مندی چھا گئی۔

کاروبار کے آغاز پر کے ایس ای 100 انڈیکس میں 615 پوائنٹس کا اضافہ ہوا اور یہ 184,789.71 کی سطح پر پہنچا، تاہم بروکرز کے تحفظات کے باعث تیزی جلد ہی مندی میں بدل گئی۔

اس وقت کے ایس ای 100 انڈیکس ایک لاکھ 84 ہزار پوائنٹس کی بالائی حد کھونے کے بعد 1150 سے زائد پوائنٹس کی گراوٹ کے ساتھ 183,021 پر ٹریڈ کر رہا ہے۔

خیال رہے کہ کاروباری ہفتے کے پانچویں اور آخری روز، کاروبار کے آغاز پر اسٹاک ایکسچینج میں زبردست تیزی دیکھی گئی تھی، جس کے نتیجے میں ہنڈرڈ انڈیکس 2500 سے زائد پوائنٹس کے اضافے کے ساتھ 184,986 کی سطح پر پہنچ گیا۔ تاہم اختتام پر ہنڈرڈ انڈیکس 1836 پوائنٹس بڑھ کر 184,174 کی سطح پر بند ہوا۔

واضح رہے کہ جمعرات کے روز ہنڈرڈ انڈیکس 6042 پوائنٹس کی کمی کے بعد 182,338 کی سطح پر بند ہوا تھا۔