پاکستان سٹاک مارکیٹ میں کاروبار کا منفی زون میں آغاز

کراچی: پاکستان سٹاک ایکسچینج (PSX) میں منفی رجحان کا سلسلہ مسلسل برقرار ہے، جہاں نئے کاروباری ہفتے کے پہلے ہی روز تجارتی سرگرمیوں کے آغاز پر شدید مندی دیکھنے میں آئی ہے۔

کاروبار کے آغاز پر ہی مارکیٹ میں سرمایہ کاروں کی جانب سے عدم استحکام اور محتاط رویے کے باعث 1800 سے زائد پوائنٹس کی ریکارڈ کمی دیکھی گئی۔ اس بڑی گراوٹ کے نتیجے میں پاکستان سٹاک ایکسچینج کا بینچمارک ’کے ایس ای-100 انڈیکس‘ کم ہو کر 1 لاکھ 68 ہزار 691 پوائنٹس کی سطح پر نیچے آ گیا۔

بازارِ حصص کے معاشی ماہرین کے مطابق، مارکیٹ میں پائے جانے والے منفی رجحان اور فروخت کے دباؤ کی وجہ سے انڈیکس میں یہ نمایاں کمی ریکارڈ کی گئی ہے۔

واضح رہے کہ گزشتہ کاروباری ہفتے کے آخری روز سٹاک ایکسچینج میں ٹریڈنگ کے اختتام پر 100 انڈیکس 1 لاکھ 70 ہزار 511 پوائنٹس کی سطح پر بند ہوا تھا۔