پاکستان سٹاک مارکیٹ میں کاروبار کا منفی زون میں آغاز

پاکستان سٹاک مارکیٹ کاروباری ہفتے کے پہلے ہی روز ایک لاکھ 70 ہزار پوائنٹس کی نفسیاتی حد برقرار رکھنے میں ناکام رہی۔ مارکیٹ کے آغاز پر ہی شدید مندی کا رجحان دیکھا گیا اور ہنڈرڈ انڈیکس میں 1500 سے زائد پوائنٹس کی بڑی کمی ریکارڈ کی گئی، جس کے بعد انڈیکس ایک لاکھ 69 ہزار 589 پوائنٹس کی سطح پر آ گیا ہے۔

واضح رہے کہ گزشتہ کاروباری ہفتے کے اختتام پر سٹاک ایکسچینج ایک لاکھ 71 ہزار 115 پوائنٹس پر بند ہوئی تھی۔ پاکستان میں مندی کے برعکس ایشیائی سٹاک مارکیٹس میں ملا جلا رجحان پایا گیا۔ جہاں جنوبی کوریا کے کوسپی انڈیکس میں 4.87 فیصد اور تائیوان میں ایک فیصد کی تیزی رہی، وہی چین کے شنگھائی کمپوزٹ انڈیکس میں بھی اضافہ دیکھا گیا۔

دوسری جانب، ہانگ کانگ اور جاپانی مارکیٹس میں معمولی گراوٹ رہی جبکہ انڈونیشیا کے جکارتہ کمپوزٹ انڈیکس میں 3 فیصد کی نمایاں مندی ریکارڈ کی گئی ہے۔ مقامی سرمایہ کار عالمی مارکیٹ کی صورتحال اور ملکی معاشی اشاریوں پر نظریں جمائے ہوئے ہیں۔