پاکستان نے ہانگ کانگ کو ہرا کر آئی بی ایس ایف اسنوکر ورلڈ کپ ٹیم ٹائٹل اپنے نام کرلیا

پاکستان نے شاندار کارکردگی دکھاتے ہوئے ہانگ کانگ کو شکست دے کر آئی بی ایس ایف اسنوکر ورلڈ کپ ٹیم چیمپئن شپ جیت لی۔ مسقط میں ہونے والے فائنل میں پاکستانی ٹیم نے بیسٹ آف فائیو فریمز میں تین دو سے کامیابی حاصل کی۔

پاکستان کی جانب سے اسجد اقبال اور محمد آصف پر مشتمل ٹیم نے نانسین وان اور چاو ہو مان کی جوڑی کو کانٹے کے مقابلے کے بعد ہرایا۔
ابتدائی سنگل میں اسجد اقبال کو چاو ہو مان نے شکست دے کر ہانگ کانگ کو برتری دلائی، تاہم دوسرے سنگل میں محمد آصف نے 82 کا شاندار بریک لگا کر مقابلہ برابر کردیا۔

ڈبلز میں ہانگ کانگ نے کامیابی حاصل کرکے دو ایک کی سبقت حاصل کی، لیکن ریورس سنگلز میں پاکستان نے شاندار کم بیک کیا۔
پہلے محمد آصف نے 100 کا سنچری بریک کھیل کر چاو ہو مان کو مات دی، اور فیصلہ کن فریم میں اسجد اقبال نے 104 کا بریک اسکور کرتے ہوئے نانسین وان کو شکست دے کر پاکستان کو تین دو سے فتح دلائی۔

یہ کامیابی محمد آصف کے شاندار کیرئیر کا ساتواں ورلڈ ٹائٹل ہے، جس میں تین ٹیم ٹائٹلز، تین انفرادی ورلڈ ٹائٹلز اور ایک ورلڈ ماسٹرز ٹائٹل شامل ہے۔