سکیورٹی فورسز نے پاک افغان سرحدی علاقے میں جارحیت ناکام بنادی، کئی طالبان ہلاک

سیکیورٹی فورسز نے پاک افغان سرحدی علاقے گلستان سیکٹر میں افغان طالبان کی جانب سے کی جانے والی جارحیت کی کوشش کو کامیابی سے ناکام بناتے ہوئے مؤثر جوابی کارروائی میں متعدد افغان طالبان کو ہلاک کر دیا ہے۔ سیکیورٹی ذرائع کے مطابق افغان طالبان نے گلستان سیکٹر میں سرحدی حد بندی کی خلاف ورزی کرتے ہوئے اشتعال انگیزی اور جارحیت کی کوشش کی، جس پر سرحد پر تعینات پاکستان کی سیکیورٹی فورسز نے فوری اور بھرپور ردِعمل دیا۔

سیکیورٹی ذرائع کا بتانا ہے کہ فورسز کی جانب سے کی جانے والی اس بروقت اور کارگر جوابی کارروائی کے نتیجے میں متعدد افغان طالبان موقع پر ہی مارے گئے، جبکہ ان کے قائم کردہ ٹھکانوں کو بھی شدید نقصان پہنچا۔ واقعے کے بعد گلستان سیکٹر میں دونوں اطراف سے وقفے وقفے سے فائرنگ کا تبادلہ جاری ہے۔ ذرائع کے مطابق پاکستان کی سیکیورٹی فورسز سرحدی دفاع کو یقینی بنانے کے لیے مکمل طور پر الرٹ اور اعلیٰ دفاعی حالت میں موجود ہیں۔