پاکستان اور روس کا تجارت، توانائی، سرمایہ کاری میں تعاون بڑھانے کا عزم

پاکستان اور روس نے تجارت، توانائی، زراعت، تعلیم، سرمایہ کاری اور عوامی روابط کے شعبوں میں دوطرفہ تعاون کو مزید وسعت دینے کے پختہ عزم کا اظہار کرتے ہوئے اس بات پر زور دیا ہے کہ دونوں ممالک کے درمیان موجود مثبت سیاسی ماحول کو اب عملی اقتصادی شراکت داری میں تبدیل کیا جائے۔ یہ اہم اتفاقِ رائے “Pakistan–Russia: Strengthening Trade, Education & Energy Collaboration” کے عنوان سے منعقدہ ایک اعلیٰ سطحی ویبینار میں سامنے آیا، جس میں دونوں ممالک کے حکومتی عہدیداروں، سفارت کاروں، کاروباری رہنماؤں اور ماہرینِ تعلیم نے شرکت کی۔

وفاقی وزیر توانائی سردار اویس احمد خان لغاری نے ویبینار سے خطاب کرتے ہوئے کہا کہ پاکستان اور روس کے درمیان تجارت، توانائی اور رابطوں کے شعبے میں غیر معمولی امکانات موجود ہیں۔ بہتر لاجسٹکس اور ٹرانسپورٹ کے ذریعے باہمی تجارت کو نمایاں طور پر بڑھایا جا سکتا ہے۔ انہوں نے مزید کہا کہ گزشتہ دو دہائیوں میں دونوں ممالک کے تعلقات باہمی اعتماد کی بنیاد پر مضبوط ہوئے ہیں اور روس، پاکستان کے لیے توانائی اور انفراسٹرکچر کا ایک اہم شراکت دار بن سکتا ہے۔

روس میں پاکستان کے سفیر فیصل نیاز ترمذی نے یقین دلایا کہ پاکستانی سفارت خانہ روسی اداروں اور جامعات کے ساتھ مل کر اقتصادی تعاون کو فروغ دیتا رہے گا۔ انہوں نے ویزا سہولتوں میں بہتری اور طلبہ کے تبادلوں کو طویل المدتی تعلقات کے لیے ناگزیر قرار دیا۔ ویبینار سے روسی وزارتِ خارجہ کے بورس برمیستروف اور نائب وزیر صنعت و تجارت الیکسی گروزدیف نے بھی خطاب کیا اور ادائیگی کے نظام (Payment System)، لاجسٹکس اور کاروباری روابط کو مستحکم بنانے پر زور دیا۔

سینٹر فار انٹرنیشنل اسٹریٹجک اسٹڈیز سندھ کے ایگزیکٹو ڈائریکٹر قاضی خلیل اللہ نے کہا کہ توانائی کا شعبہ دونوں ممالک کے تعلقات کا مرکزی ستون بن سکتا ہے۔ اس کے علاوہ کاروباری ماہر دیمتری انتونوف نے سمندری تجارت اور زراعت میں نجی شعبے کو فعال کرنے، جبکہ ڈاکٹر اسماء نوید اور ڈاکٹر سویتلانا مینیوروا نے روسی زبان کی تعلیم، اساتذہ کی تربیت اور مشترکہ سائنسی و تدریسی منصوبوں پر زور دیا۔ اختتامی نشست میں روسی جغرافیائی سیاسی ماہر ڈاکٹر روکسولانا زیگون نے کہا کہ دونوں ممالک میں اعتماد مثالی ہے، جسے اب عوامی سفارت کاری کے ذریعے مزید آگے بڑھانے کی ضرورت ہے۔