بھارت سندھ طاس معاہدے کی خلاف ورزی، دہشتگردی کی سرپرستی کررہا ہے: پاکستان

پاکستان نے اقوام متحدہ کی سلامتی کونسل میں بھارتی نمائندے کے تمام بے بنیاد الزامات کو سختی سے مسترد کرتے ہوئے دو ٹوک الفاظ میں کہا ہے کہ بھارت خود سندھ طاس معاہدے کی خلاف ورزی اور خطے میں دہشت گردی کی سرپرستی میں ملوث ہے۔

سلامتی کونسل میں خطاب کرتے ہوئے پاکستانی سفارت کار انصار شاہ نے کہا کہ بھارت حقائق کو مسخ کرنے کی ناکام کوشش کر رہا ہے، جبکہ سندھ طاس معاہدے کو یکطرفہ طور پر معطل کرنے کی کوئی قانونی گنجائش نہیں ہے۔ انہوں نے یاد دہانی کروائی کہ اگست 2025 میں ثالثی عدالت بھی فیصلہ دے چکی ہے کہ یہ معاہدہ نافذ العمل ہے۔ مشترکہ آبی وسائل کو سیاسی ہتھیار کے طور پر استعمال کرنا عالمی قوانین اور علاقائی امن کے لیے شدید خطرہ ہے۔

پاکستانی سفارت کار نے بھارت کی جانب سے دہشت گردی کے الزامات کا جواب دیتے ہوئے کہا کہ نیو دہلی کے حمایت یافتہ گروہ، جن میں تحریک طالبان پاکستان (ٹی ٹی پی)، بی ایل اے اور مجید بریگیڈ شامل ہیں، پاکستان میں ہزاروں شہریوں کی شہادت میں ملوث ہیں۔ اس کے علاوہ شمالی امریکہ اور دیگر ملکوں میں ماورائے عدالت قتل کی کارروائیوں میں بھی بھارت کے ملوث ہونے کے کھلے شواہد موجود ہیں۔

انصار شاہ نے مقبوضہ جموں و کشمیر کا ذکر کرتے ہوئے کہا کہ بھارت سلامتی کونسل کی قراردادوں کی خلاف ورزی کرتے ہوئے کشمیریوں کے حقِ خودارادیت کو سلب کر رہا ہے۔ جموں و کشمیر کبھی بھارت کا حصہ نہیں تھا اور نہ رہے گا، اور قابض طاقت کے کسی بھی یکطرفہ اقدام سے اس کی قانونی حیثیت تبدیل نہیں ہو سکتی۔ انہوں نے بھارت پر زور دیا کہ وہ اقوام متحدہ کے منشور اور عالمی قوانین کے تحت اپنی ذمہ داریاں پوری کرے