امریکا اور ایران مذاکرات پر آمادہ، پاکستان اور قطر نے ثالثی کی کوششیں تیز کردیں

پاکستان اور قطر نے امریکہ اور ایران کے درمیان تناؤ کم کرنے اور سفارتی مذاکرات کی بحالی کے لیے اپنی ثالثی کی کوششیں تیز کر دی ہیں۔ عرب میڈیا رپورٹس کے مطابق دونوں ممالک نے اپنی ثالثی تجاویز پر واشنگٹن اور تہران کے باضابطہ موقف حاصل کر لیے ہیں، جبکہ ایران نے مذاکرات کا عمل آگے بڑھانے پر آمادگی کا اظہار کیا ہے۔ ذرائع کے مطابق آئندہ مذاکرات کا ممکنہ دور جنیوا، دوحہ یا اسلام آباد میں منعقد ہو سکتا ہے۔ دریں اثنا، ایک سینئر ایرانی عہدیدار نے واضح کیا کہ اگر امریکہ حملے روکتا ہے تو ایران بھی کسی قسم کی کارروائی نہیں کرے گا۔ تاہم، اس تمام تر سفارتی پیش رفت پر ابھی دونوں ممالک کا باضابطہ سرکاری ردعمل آنا باقی ہے۔