پاک بحریہ کی بحیرہ عرب میں بڑی کارروائی، 3 ملین ڈالر کی 15 سو کلو حشیش برآمد

حریہ عرب میں ریجنل میری ٹائم سیکیورٹی پیٹرول کے دوران پاک بحریہ کے جہاز یامامہ نے انسدادِ منشیات کی کامیاب کارروائی کرتے ہوئے 1 ہزار 500 کلوگرام حشیش قبضے میں لے لی۔ قبضے میں لی گئی منشیات کی مالیت تقریباً 3 ملین امریکی ڈالر بتائی جاتی ہے۔
آئی ایس پی آر کے مطابق سمندر میں کی جانے والی یہ کامیاب کارروائی پاک بحریہ کے منشیات کی اسمگلنگ سمیت غیر قانونی سرگرمیوں کے خلاف غیر متزلزل عزم کا واضح ثبوت ہے۔

بیان میں کہا گیا کہ پاک بحریہ باقاعدگی سے مشنز انجام دیتی ہے تاکہ سمندری حدود میں قومی مفادات کا تحفظ، موثر نگرانی اور سیکیورٹی کو یقینی بنایا جا سکے۔
مزید بتایا گیا کہ پاک بحریہ علاقائی اور عالمی سطح پر بحری سیکیورٹی کے لیے مشترکہ کوششوں میں سرگرم کردار ادا کر رہی ہے اور محفوظ و پُرامن سمندری ماحول کے قیام میں نمایاں خدمات سرانجام دے رہی ہے