ملک بھر میں بارشیں، چھتیں گرنے اور کرنٹ لگنے سے مزید 19 افراد جاں بحق

پاکستان بھر میں جاری ہلاکت خیز بارشوں کے باعث چھتیں گرنے، کرنٹ لگنے اور ڈوبنے کے مختلف حادثات میں مزید 19 افراد زندگی کی بازی ہار گئے، جس کے بعد 26 جون سے اب تک جاں بحق ہونے والوں کی مجموعی تعداد 97 تک پہنچ گئی ہے۔ لاہور کے علاقے گڑھی شاہو میں گھر کی چھت گرنے سے میاں بیوی اور بیٹی جاں بحق جبکہ ایک بیٹی زخمی ہوئی۔ گجرات میں چھت گرنے سے تین بہن بھائی دم توڑ گئے، جبکہ قصور میں دو افراد جان کی بازی ہار گئے۔ اس کے علاوہ حجرہ شاہ مقیم اور ہنگو کے علاقے درسمند میں بھی مکانات کی چھتیں گرنے سے خاتون اور دو بچوں سمیت متعدد افراد جاں بحق اور زخمی ہوئے۔

بارش کے پانی اور بجلی کے حادثات نے بھی کئی قیمتی جانیں لیں۔ قصور کے علاقے راجہ جنگ میں بارش کے جمع شدہ پانی میں ڈوب کر دو بچے جان بحق ہوئے جبکہ تھرپارکر میں بھی ایک شخص ڈوب گیا۔ بہاولنگر، اوکاڑہ اور ڈسکہ میں کرنٹ لگنے سے تین افراد لقمہ اجل بنے۔ شیخوپورہ میں مسافر بس پر بجلی کی تاریں گرنے سے بس کنڈکٹر جاں بحق اور 6 مسافر زخمی ہوئے، جبکہ عمرکوٹ میں آسمانی بجلی گرنے سے ایک بچہ دم توڑ گیا۔