پاکستان کرغزستان کے درمیان توانائی و تجارت سمیت 15 معاہدوں پر دستخط

پاکستان اور کرغزستان کے درمیان توانائی، تجارت، سرمایہ کاری اور باہمی تعاون کے مختلف شعبوں میں 15 معاہدوں اور مفاہمت کی یادداشتوں پر دستخط ہوئے، جس سے دوطرفہ تعلقات کے نئے دور کا آغاز ہو گیا۔

وزیر اعظم ہاؤس پہنچنے پر کرغزستان کے صدر صادر جپاروف کو شاندار انداز میں خوش آمدید کہا گیا اور انہیں گارڈ آف آنر پیش کیا گیا۔
صدر جپاروف نے وزیراعظم شہباز شریف سے ملاقات کی، جس میں فیلڈ مارشل عاصم منیر نے بھی شرکت کی۔

ملاقات میں وزیراعظم نے پاکستان کی “وژن سینٹرل ایشیا” پالیسی کو مزید مضبوط بنانے کے عزم کا اعادہ کیا۔ دونوں رہنماؤں نے تجارت، سرمایہ کاری اور علاقائی روابط کے فروغ پر اتفاق کیا، جبکہ روڈ کوریڈور کے فعال ہونے پر اطمینان کا اظہار کیا۔

گفتگو میں اس بات پر زور دیا گیا کہ تنازعات کو بین الاقوامی قانون اور اقوامِ متحدہ کے چارٹر کے مطابق پُرامن طریقے سے حل کیا جانا چاہیے۔ اسی دوران افغانستان کے پُرامن مستقبل اور خطے میں استحکام پر بھی تبادلہ خیال ہوا۔

کرغزستان کے صدر نے پاکستان کو قابلِ اعتماد دوست قرار دیا اور کہا کہ توانائی ضروریات پوری کرنے کے لیے کاسا 1000 انتہائی اہم منصوبہ ہے۔ انہوں نے دہشت گردی کے خاتمے کے لیے پاکستان کے ساتھ مشترکہ عزم کا بھی اظہار کیا۔

بعد ازاں دونوں ملکوں کے درمیان توانائی، تجارت، ٹرانسپورٹ، سیکیورٹی اور دیگر شعبوں میں تعاون سے متعلق 15 معاہدوں اور ایم او یوز پر دستخط ہوئے، جن سے دوطرفہ شراکت داری مزید مستحکم ہو گی۔

واضح رہے کہ کرغزستان کے صدر صادر جپاروف گزشتہ روز دو روزہ سرکاری دورے پر اسلام آباد پہنچے تھے، جہاں صدر آصف علی زرداری اور وزیراعظم شہباز شریف نے ان کا استقبال کیا۔