پاکستان عالمی بانڈ مارکیٹ میں واپسی اور پانڈا بانڈ متعارف کرانے کی تیاری کر رہا ہے،محمد اورنگزیب

وفاقی وزیر خزانہ محمد اورنگزیب نے بلومبرگ کو بتایا کہ پاکستان چار سال بعد عالمی بانڈ مارکیٹ میں واپس آئے گا اور جلد اپنا پہلا پانڈا بانڈ بھی جاری کرے گا۔ حکومت مالی مشیروں کے انتخاب کے لیے جلد تجویز جاری کرے گی۔

انہوں نے کہا کہ پاکستان میں معاشی استحکام کی صورتحال بہتر ہو رہی ہے، مہنگائی کم ہو گئی، مالی خسارہ اور کرنٹ اکاؤنٹ بہتر ہو رہے ہیں اور روپیہ گزشتہ ڈیڑھ سال سے مستحکم ہے۔ ترسیلات زر اور سروسز کی برآمدات میں بھی اضافہ ہوا ہے۔

وزیر خزانہ نے کہا کہ حکومت اصلاحات جاری رکھے ہوئے ہے، جس میں سرکاری اداروں کی نجکاری اور ٹیکس نیٹ کو وسیع کرنا شامل ہے۔ قومی ایئرلائن فروخت ہو چکی ہے اور دیگر ایس او ایز کی نجکاری کے منصوبے زیر غور ہیں۔ حکومت کی ترجیح برآمدات پر مبنی ترقی ہے۔