وفاقی حکومت کے قرضوں میں 9.3 فیصد اضافہ، مجموعی حجم 80 ہزار 524 ارب روپے تک پہنچ گیا

اسٹیٹ بینک آف پاکستان کی جانب سے جاری کردہ تازہ ترین اعداد و شمار کے مطابق، وفاقی حکومت کے مجموعی قرضوں میں سالانہ بنیادوں پر 9.3 فیصد اضافہ ریکارڈ کیا گیا ہے، جس کے بعد مارچ 2026 تک قرضوں کا کل حجم 80 ہزار 524 ارب روپے کی سطح پر پہنچ گیا ہے۔ گزشتہ سال اسی عرصے میں یہ قرضے 73 ہزار 688 ارب روپے تھے۔ مرکزی بینک کی رپورٹ کے مطابق مقامی قرضوں میں 11.7 فیصد کا بڑا اضافہ ہوا جو بڑھ کر 57 ہزار 566 ارب روپے ہو گئے ہیں، جبکہ بیرونی قرضے 3.6 فیصد اضافے کے ساتھ 22 ہزار 959 ارب روپے ریکارڈ کیے گئے۔ اگرچہ ماہانہ بنیادوں پر بیرونی قرضوں میں 1.1 فیصد کی معمولی کمی دیکھی گئی، تاہم مقامی قرضوں میں 1.6 فیصد اضافے کے باعث مجموعی حکومتی قرضوں میں ماہانہ 0.8 فیصد کی نمو درج کی گئی ہے۔