آئندہ مالی سال کا وفاقی بجٹ جون کے پہلے ہفتے میں پیش کیے جانے کا امکان

وزارت خزانہ نے آئندہ مالی سال کے وفاقی بجٹ کی تیاری کے لیے باضابطہ بجٹ کلینڈر جاری کر دیا ہے، جس کے مطابق بجٹ جون کے پہلے ہفتے میں قومی اسمبلی میں پیش کیے جانے کا امکان ہے۔

دستاویزات کے مطابق وزارت خزانہ کا بجٹ ونگ فروری میں ششماہی معاشی رپورٹ قومی اسمبلی میں پیش کرے گا، جبکہ آئندہ بجٹ کے لیے تمام وزارتوں اور محکموں کی معاشی کارکردگی کا جائزہ 20 فروری تک مکمل کر لیا جائے گا۔

بجٹ کلینڈر کے مطابق تمام وزارتیں اور ان کے ماتحت ادارے 20 فروری تک بجٹ کے ابتدائی تخمینے اور ترقیاتی اخراجات کے تخمینے وزارت خزانہ کو فراہم کریں گے۔

آئندہ مالی سال کے لیے وزارتوں کی بجٹ جائزہ کمیٹی کے اجلاس 30 مارچ سے 12 اپریل تک منعقد ہوں گے، جبکہ بجٹ اسٹریٹجی پیپر 20 اپریل تک تیار کیا جائے گا۔

دستاویز میں بتایا گیا ہے کہ سالانہ منصوبہ بندی کوآرڈینیشن کمیٹی (APCC) کا اجلاس مئی کے پہلے ہفتے میں ہوگا، جس کے بعد وزیراعظم کی زیر صدارت قومی اقتصادی کونسل (NEC) کا اجلاس مئی کے دوسرے ہفتے میں منعقد کیا جائے گا۔

وزارت خزانہ کے مطابق آئندہ مالی سال کے بجٹ سے متعلق تمام دستاویزات کی تیاری مئی کے آخر تک مکمل کر لی جائے گی۔