اسلام آباد: نائب وزیراعظم اسحاق ڈار کی زیر صدارت بین الوزارتی اجلاس، یورپی یونین کے ساتھ اقتصادی تعاون پر زور

اسلام آباد: نائب وزیراعظم اور وزیر خارجہ اسحاق ڈار کی زیرِ صدارت ایک اعلیٰ سطح بین الوزارتی اجلاس کا انعقاد کیا گیا، جس میں یورپی یونین کے ساتھ اقتصادی اور تجارتی تعاون بڑھانے کے اقدامات کا جائزہ لیا گیا۔

نائب وزیراعظم اسحاق ڈار نے کہا کہ یورپی یونین پاکستان کا کلیدی اقتصادی پارٹنر ہے اور جی ایس پی پلس فریم ورک کے تحت تجارت کو وسعت دینا ناگزیر ہے۔ انہوں نے مزید کہا کہ پاکستان نے جی ایس پی پلس کے چار دو سالہ جائزے کامیابی سے مکمل کر لیے ہیں اور اسکیم کے تحت اپنی تمام ذمہ داریاں پوری کرنے کے لیے پرعزم ہے۔

اجلاس میں وفاقی وزیر قانون، سیکرٹری خارجہ آمنہ بلوچ، سیکرٹری تجارت، داخلہ، انسانی حقوق اور سمندر پار پاکستانیز کے نمائندے بھی شریک ہوئے۔ علاوہ ازیں بیلجیم میں متعین پاکستانی سفیر اور وفاقی و صوبائی محکموں کے دیگر اعلیٰ حکام نے بھی اجلاس میں شرکت کی۔