وزارت خزانہ کی ورکنگ نامکمل، پانڈا بانڈز کے اجراء میں چوتھی بار تبدیلی

باوثوق ذرائع کے مطابق پاکستان کی حکومت نے رواں ماہ فروری میں 25 کروڑ ڈالر مالیت کے پانڈا بانڈز کے اجرا کا منصوبہ مؤخر کر دیا ہے، کیونکہ وزارت خزانہ کی ورکنگ مکمل نہ ہونے کی وجہ سے فروری کے پہلے ہفتے میں بانڈز جاری نہیں کیے جا سکے۔

وزارت خزانہ کے حکام آئندہ ماہ کے دوران بانڈز کے اجرا کے لیے پرامید ہیں، تاہم حتمی تاریخ کا اعلان تاحال نہیں کیا گیا۔

یہ بانڈز جاری کرنے کا عمل رواں مالی سال کے دوران چوتھی مرتبہ تبدیل ہوا ہے، جبکہ حکومت ایک اعشاریہ 2 ارب ڈالر کی یوروبانڈز کی ادائیگی اپریل 2026 میں کرنے کی مالی تیاری کر رہی ہے۔

پانڈا بانڈز کے اجرا کے لیے ابھی بھی وزارت خزانہ کی ورکنگ مکمل ہونا باقی ہے، اور ایشیائی ترقیاتی بینک (ADB) اور ایشیائی انفراسٹرکچر انویسٹمنٹ بینک (AIIB) 95 فیصد تک گارنٹی فراہم کریں گے۔

پاکستان تاریخ میں پہلی بار چین کی انٹر بینک بانڈ مارکیٹ میں پانڈا بانڈ جاری کرنے جا رہا ہے، جس کے ذریعے ابتدائی طور پر 25 کروڑ ڈالر چینی یوآن کے برابر اکٹھے کیے جائیں گے۔ بانڈز کی مدت تین سال ہوگی اور شرح منافع مقررہ (فکسڈ) ریٹ پر ہوگی، جو متوقع طور پر سنگل ڈیجٹ میں رہنے کی پیش گوئی کی گئی ہے۔