پاکستان کسٹمز کا بڑا فیصلہ، شپنگ انڈسٹری میں سرکاری ایکسچینج ریٹ نافذ

فیڈرل بورڈ آف ریونیو (ایف بی آر) کے مطابق پاکستان کسٹمز نے جہاز رانی کی صنعت کے لیے سٹیٹ بینک آف پاکستان کے سرکاری ایکسچینج ریٹس کے مطابق شپنگ چارجز نافذ کر دیے ہیں، جس کے بعد بین الاقوامی شپنگ لائنز کی جانب سے من مانی بلنگ کا مکمل خاتمہ ہو گیا ہے۔

ایف بی آر کا کہنا ہے کہ آل پاکستان شپنگ ایسوسی ایشن نے اس فیصلے کی باضابطہ تصدیق کر دی ہے۔ یہ پیش رفت پاکستان کسٹمز کی قائم کردہ اعلیٰ سطحی کمیٹی کی مسلسل مشاورت اور کاوشوں کا نتیجہ ہے، جس نے شپنگ ایجنٹس، ٹرمینل آپریٹرز، تجارتی تنظیموں اور بین الاقوامی شپنگ لائنز سے تفصیلی بات چیت کی۔

ایف بی آر کے مطابق مرسک (Maersk) سمیت دیگر بین الاقوامی شپنگ لائنز نے سرکاری شرح مبادلہ پر عملدرآمد شروع کر دیا ہے، جس سے تاجروں اور برآمد کنندگان پر لاگت کا دباؤ کم ہونے کی توقع ہے۔