سعودی عرب کی جانب سے ایران کو حوثی باغیوں کو لگام دینے کا پیغام

بین الاقوامی خبر رساں ادارے (برطانوی خبر ایجنسی) کی ایک خصوصی رپورٹ کے مطابق، سعودی عرب پر یمن کے حوثی باغیوں کے حالیہ تباہ کن حملوں کے بعد پاکستان نے سعودی عرب کا ایک اہم انتباہی پیغام ایران تک پہنچایا ہے، جس میں تہران پر زور دیا گیا ہے کہ وہ اپنے حوثی اتحادیوں کو فوری طور پر کنٹرول کرے۔ ذرائع کے مطابق پاکستان، سعودی عرب اور ترکیہ کے میان طے پانے والے سہ فریقی دفاعی معاہدے کے پس منظر میں پاکستان کا یہ اقدام علاقائی سیکیورٹی اور سفارت کاری میں انتہائی اہم سمجھا جا رہا ہے۔ اسلام آباد نے ایران پر واضح کیا ہے کہ وہ حوثیوں کو لگام دے، ورنہ اس پراکسی تنازع کے ایک وسیع تر علاقائی سیکیورٹی بحران میں تبدیل ہونے کا شدید خطرہ ہے۔

پاکستانی ذرائع اور سینیئر علاقائی سفارت کار کے مطابق اسلام آباد اور انقرہ کے سینیئر عسکری نمائندوں نے ریاض میں سعودی حکام سے اہم ملاقات کی، جس میں مشترکہ ردِعمل کو مربوط بنانے پر مشاورت کی گئی۔ تاہم، تینوں ممالک نے اس بات پر مکمل اتفاق کیا ہے کہ ان کی افواج یمن میں داخل نہیں ہوں گی اور کسی بھی نوعیت کی دفاعی یا جوابی کارروائی صرف سعودی حدود تک ہی محدود رہے گی۔ پاکستانی حکام نے واضح کیا کہ سعودی عرب کے ساتھ ان کا دفاعی معاہدہ ہے، جس کے تحت پاکستانی فورسز سعودی سرزمین کے اندر فوجی، تکنیکی، زمینی یا فضائی تحفظ فراہم کر سکتی ہیں لیکن کسی غیر ملکی سرزمین پر جنگی آپریشنز کا حصہ نہیں بنیں گی۔ یاد رہے کہ منگل کے روز حوثیوں نے خمیس مشیط میں ایئربیس اور قریبی تیل تنصیبات پر شدید حملہ کیا تھا، جس میں 73 افراد زخمی ہوئے تھے۔