مالی سال 2026-27 کے بجٹ کی تیاریوں کا آغاز، وزارت خزانہ نے بجٹ کال سرکلر جاری کر دیا

وفاقی حکومت نے مالی سال 2026-27 کے بجٹ کی تیاریوں کا باقاعدہ آغاز کر دیا ہے۔ وزارتِ خزانہ نے بجٹ کال سرکلر جاری کرتے ہوئے تمام وزارتوں اور محکموں کو ہدایت کی ہے کہ وہ اہم بجٹ فارم، ریونیو اور اخراجات کے نظرثانی شدہ تخمینے اور ترقیاتی منصوبوں کی تفصیلات 20 فروری تک جمع کرائیں۔

وزارتِ خزانہ کے مطابق بجٹ ریویو کمیٹی کے اجلاس 30 مارچ سے 12 اپریل 2026 تک ہوں گے، جبکہ بجٹ اسٹریٹجی پیپر کی منظوری 20 اپریل تک حاصل کی جائے گی۔ کرنٹ اور ترقیاتی بجٹ کے لیے بجٹ سیلنگ 21 سے 25 اپریل کے دوران مکمل کی جائے گی۔

سالانہ پلان کوآرڈینیشن کمیٹی کے اجلاس مئی کے پہلے ہفتے اور قومی اقتصادی کونسل کا اجلاس مئی کے دوسرے ہفتے میں منعقد ہوگا۔ تمام بجٹ دستاویزات مئی کے آخر تک مکمل کر دی جائیں گی، جبکہ سہ ماہی بجٹ تخمینے 30 جون تک جمع کرائے جائیں گے۔

اس کے علاوہ عبوری معاشی فریم ورک رواں ماہ کے دوران تیار کیا جائے گا اور مڈ ایئر ریویو رپورٹ فروری 2026 میں قومی اسمبلی میں پیش کی جائے گی۔ ایکسچینج ریٹ سے متعلق اطلاع 15 اپریل تک فراہم کی جائے گی۔