ایشین ٹیم سکواش چیمپئن شپ جیتنے پر قومی کھلاڑیوں میں 40 لاکھ کے انعامات تقسیم

ایشین ٹیم اسکواش چیمپئن شپ جیتنے والی پاکستان قومی اسکواش ٹیم کے کھلاڑیوں کی حوصلہ افزائی کے لیے 40 لاکھ روپے کے نقد انعامات تقسیم کیے گئے۔

وفاقی وزیر برائے بین الصوبائی رابطہ رانا ثناء اللہ نے ایک خصوصی تقریب میں فاتح کھلاڑیوں کو انعامات سے نوازا۔ اس موقع پر گولڈ میڈل جیتنے والے چاروں قومی اسکواش اسٹارز نور زمان، محمد عاصم خان، ناصر اقبال اور اشعب عرفان کو فی کس 10، 10 لاکھ روپے کے چیک دیے گئے۔ واضح رہے کہ پاکستان نے فائنل معرکے میں کوریا کی ٹیم کو 0-2 سے شکست دے کر شاندار انداز میں ایشین ٹائٹل اپنے نام کیا تھا۔

تقریب سے خطاب کرتے ہوئے وفاقی وزیر رانا ثناء اللہ نے کھلاڑیوں، کوچز اور ٹیم مینجمنٹ کو اس تاریخی کامیابی پر مبارکباد پیش کی اور کہا کہ ایشین اسکواش کا ٹائٹل جیتنا پوری قوم کے لیے باعثِ فخر ہے۔ انہوں نے مزید کہا کہ کھلاڑیوں کی انتھک محنت، نظم و ضبط اور عزم کی بدولت پاکستان نے ہوم گراؤنڈ پر یہ اعزاز حاصل کیا ہے، اور حکومت قومی ٹیلنٹ کی سرپرستی و کھلاڑیوں کی بھرپور پذیرائی کا سلسلہ آئندہ بھی جاری رکھے گی۔