پاک بحریہ نے اینٹی شپ بیلسٹک میزائل کا کامیاب تجربہ کر لیا

اسلام آباد: پاک بحریہ نے اینٹی شپ بیلسٹک میزائل کا کامیاب تجربہ کر لیا ہے۔ آئی ایس پی آر کے مطابق یہ میزائل پاکستان نے خود تیار کیا ہے اور یہ سمندری و زمینی اہداف کو اعلیٰ درستی کے ساتھ نشانہ بنانے کی صلاحیت رکھتا ہے۔

اعلامیے میں بتایا گیا کہ یہ ویپن سسٹم شاندار گائیڈنس اور جدید خصوصیات کا حامل ہے، اور اس کی کامیاب ٹیسٹ فلائٹ پاکستان کی تکنیکی مہارت اور قومی مفادات کے تحفظ کے لیے پاک بحریہ کے پختہ عزم کا ثبوت ہے۔

ٹیسٹ فلائٹ کا مشاہدہ نیول چیف ایڈمرل نوید اشرف، سینئر سائنسدانوں اور انجینئروں نے کیا۔ صدر مملکت آصف علی زرداری، وزیراعظم شہباز شریف اور فیلڈ مارشل حافظ عاصم منیر نے کامیاب تجربے پر شریک یونٹس اور سائنسدانوں کو مبارک باد دی۔

آئی ایس پی آر کے مطابق چیئرمین جوائنٹ چیفس آف اسٹاف کمیٹی اور سروسز چیفس نے بھی اس اہم کارنامے پر شریک یونٹس اور سائنسدانوں کو سراہا۔