قومی اسمبلی میں اپوزیشن کا اسرائیلی جارحیت پر مذمتی قرارداد نہ پاس ہونے پر سخت ردعمل

قومی اسمبلی کے اجلاس میں اپوزیشن لیڈر محمود خان اچکزئی نے اظہار خیال کرتے ہوئے کہا کہ پارلیمنٹ نے اسرائیلی جارحیت پر ابھی تک مذمتی قرارداد نہیں پاس کی، اور یہ صورتحال قابل قبول نہیں۔ انہوں نے کہا کہ دنیا کو یہ دکھانا ہوگا کہ موجودہ حکومت عوام کی نمائندہ نہیں ہے۔

اپوزیشن لیڈر نے قومی حکومت کی ضرورت پر زور دیتے ہوئے کہا کہ ایسی حکومت میں تمام پارٹیاں شامل ہوں اور موجودہ پارلیمنٹ کو عوام کا حقیقی نمائندہ بنایا جائے۔ ان کا کہنا تھا کہ “زر اور زور کی بنیاد پر یہ پارلیمنٹ بنی ہے اور یہ حکومت موجودہ حالات میں پاکستان نہیں چلا سکتی۔”

انہوں نے خطے میں بڑھتی کشیدگی، پٹرول کی قیمتوں میں اضافہ اور ایک روحانی پیشوا کے شہادت جیسے معاملات پر پارلیمنٹ کی خاموشی پر بھی تنقید کی۔

اجلاس کے دوران ڈپٹی اسپیکر نے واضح کیا کہ اپوزیشن اپنے تحریکیں لے کر آئے تو کنسینسس کی صورت میں یہ قراردادیں پاس ہو سکتی ہیں، اور اجلاس کے دوران پارٹیوں کے چیف وہیپ نام فراہم کرتے ہیں۔ انہوں نے اپوزیشن سے کہا کہ یہ اقدام ان کی ذمہ داری ہے تاکہ پارلیمنٹ کے فیصلے عوامی توقعات کے مطابق ہوں۔